Դիպլոմային աշխատանքի կառուցվածքին ներկայացվող պահանջներն են՝
1.Տիտղոսաթերթ։ Տիտղոսաթերթը աշխատանքի սահմանված կարգով լրացված առաջին էջն է, որն ունի տեղեկատվական բնույթ (տես՝ հավելված)։ Այստեղ պետք է զետեղված լինեն հետևյալ տվյալները՝
- հաստատության անվանումը․ Երևանի «Մխիթար Սեբաստացի» կրթահաալիրի քոլեջ
- հեղինակի անունը, ազգանունը, հայրանունը
- աշխատանքի վերնագիրը
- մասնագիտության անվանումը
- ղեկավարի պաշտոնը, անունը և ազգանունը
- քաղաքը և տարին:
2․ Բովանդակություն։ Ըստ հերթականության՝ ներկայացվում են աշխատանքի բոլոր բաժինները, դրանց համապատասխան էջերը, ինչպես նաև հավելվածները (առկայության դեպքում), որոնք կցվում են աշխատանքին։ Այն պարունակում է`
- ներածություն,
- բոլոր գլուխների, բաժինների, ենթաբաժինների և կետերի անվանումները (եթե դրանք վերնագրված են),
- ամփոփում,
- օգտագործած գրականության ցանկ
- հավելվածներ (եթե դրանք առկա են):
Բոլոր գլուխների և ենթագլուխների անվանումները պետք է գրված լինեն նույն ձևակերպմամբ և հերթականությամբ, այնպես, ինչպես տեղ են գտել աշխատանքում: Բովանդակությունը զետեղվում է աշխատանքի սկզբում: Յուրաքանչյուր կառուցվածքային բաղադրիչին պիտի հաջորդի էջի համարը:
3․Ներածություն։ Ներկայացվում են աշխատանքի արդիականությունը, նպատակն ու խնդիրները, վերլուծական և/կամ կիրառական նշանակությունը։ Ներածությունում՝
- հիմնավորվում է թեմայի (հիմնահարցի) արդիականությունը և տեսական կամ գործնական կարևորությունը,
- տրվում է քննարկվող խնդրի արդի վիճակի ընդհանուր գնահատականը, տվյալ հետազոտությունների անհրաժեշտության հիմնավորումը,
- աշխատանքի նպատակը
- խնդիրները (ուսումնասիրման ենթակա հիմնահարցերը)
- նշվում են աշխատանքի կատարման ընթացքում օգտագործված մեթոդները,
- ներկայացվում է աշխատանքի կառուցվածքը (հիմնական գլուխների, ենթագլուխների համառոտ շարադրանքը)։
Ներածությունը, որպես կանոն, հակիրճ բաժին է, նրա ծավալը չպետք է գերազանցի 3 էջը։
4․Հիմնական մաս։ Աշխատանքի հիմնական մասը բաղկացած է գլուխներից և ենթագլուխներից: Այն ներառում է օգտագործված գրականության և ուսումնասիրվող հիմնախնդրի վերլուծությունը, իրականացված նախագծի կամ հետազոտության համառոտ նկարագրությունը, կիրառված մեթոդների ուսումնասիրության արդյունքների շարադրումը և վերլուծությունը։ Գլուխները կարելի է խմբավորել ըստ հիմնական բաժինների՝ տեսական և գործնական-կիրառական: Տեսական գլխում (գլուխներում) պետք է արտացոլվի ընտրված թեմայի հիմնավորումը, համառոտ ներկայացվեն այդ թեմայով գոյություն ունեցող այն աշխատությունները, որոնք ուսումնասիրել կամ որոնցից օգտվել է հեղինակը, պետք է առանձնացվեն այն տեսական դրույթները, որոնք հիմք են հանդիսացել գործնական աշխատանքի համար։
Գործնական գլխում (գլուխներում) պետք է ներկայացվեն՝
- այն հիմնահարցը, որի հետազոտման համար իրականացվել է գործնական աշխատանքը,
- հետազոտական աշխատանքի մեթոդները, պլանը,
- իրականցման քայլերը,
- արդյունքները,
- եզրահանգումները։
Վերջաբանը կամ եզրակացությունը պետք է պարունակի՝
- հետազոտությունների հիմնական արդյունքները և դրանց հիման վրա արված եզրակացությունները,
- ստացված արդյունքների օգտագործման գործնական կիրառման վերաբերյալ առաջարկներ,
- կատարված աշխատանքի մանկավարժական, մեթոդական նշանակությունը,
Վերջաբանը, որպես կանոն, հակիրճ բաժին է, և նրա ծավալը չպետք է գերազանցի 2-3 էջը:
- Եզրակացություններ։ Ներկայացվում են եզրակացությունները, որոնցում ամփոփվում են աշխատանքի արդյունքները։
- Օգտագործված գրականության ցանկ։ Նշվում է միայն այն գրականությունը, որն օգտագործվել է աշխատանքը շարադրելիս, և որին համապատասխան հղումներ են արված։
- Հղումներ։ Հղումները պարտադիր են․ տրվում են տողատակում 8 pt տառաչափով, տողերի հեռավորությունը` 1, երկու կողմից հավասարեցված (alignment: Justify): Հղման մեջ պետք է ներկայացված լինեն օգտագործված աշխատանքի հեղինակի ազգանունը և անվան առաջին տառը (թավ տառերով` Bold), այնուհետև` աշխատանքի վերնագիրը, հրատարակման վայրը, թվականը, հղվող աշխատանքի էջերի ընդհանուր քանակը։