Մասնագիտական ուսումնասիրությունը Քոլեջում նախատեսված է հիմնական կրթությամբ երկրորդ, երրորդ կուրսերի սովորողների համար, որով ուսանողն ամփոփում է իր ուսումնառության տարին, մեկտեղում մասնագիտական գիտելիքները, հմտությունները, կարողությունները, կազմակերպում դրանց հանրային ներկայացումը։
Մասնագիտական ուսումնասիրության իրականացումը դիտվում է որպես ուսումնական նախագիծ։ Կարևորվում է նախագծերի հանրային ներկայացումը՝ որպես նախագծային գործունեության պարտադիր փուլ։ Մասնագիտական ուսումնասիրության վերջնարդյունքը պիտի դառնա ուսումնական նյութ, տեսական և գործնական արտադրանք։
Մասնագիտական ուսումնասիրություն-նախագիծը ուսանողի համար պարտադիր ուսումնական աշխատանք է, որոշված Քոլեջի ուսումնական օրացույցով։
Անցկացման փուլերը՝
- Թեմայի ընտրություն, հիմնավորում
- Ընտրված թեմայի շուրջ աշխատանք
- Աշխատանքի հրապարակում, հանրային ներկայացում
- Ներկայացված աշխատանքի գնահատում
Թեմայի ընտրություն՝
Յուրաքանչյուր ուսումնական տարվա սեպտեմբերի 1-15-ը ուսանողը ծանոթանում է նախապես հրապարակված թեմաներին, ընտրում, գրանցվում էլեկտրոնային ձևաթղթում։ Հրապարակված թեմաների ընտրությանը մասնակցում են նաև ուսանողները։ Ուսանողը կարող է առաջարկել թեմա ուսումնական տարվա դասընթացների ծրագրերից իր նախընտրությամբ։ Յուրաքանչյուր ուսանող կարող է ընտրել մեկ թեմա՝ մասնագիտական ուսումնասիրություն կատարելու համար։
Ուսումնասիրության ընթացքում ուսանողին անհրաժեշտ են որոշակի տեսական և գործնական գիտելիքներ տվյալ թեմայի վերաբերյալ մասնագիական վերլուծություններ, ձևակերպումներ ներկայացնելու համար։
Մասնագիտական ուսումնասիրությունը պետք է ունենա ղեկավար: Աշխատանքն սկսելուց առաջ ղեկավարի խորհրդատվությամբ, աջակցությամբ մշակվում է կատարման, հանդիպումների նախագիծ-պլան, որը հաստատվում է Քոլեջի ղեկավարի կողմից։ Աշխատանքների ընթացքը որոշակի պարբերականությամբ պիտի երևա և՛ ղեկավարի, և՛ ուսանողի բլոգներում։ Յուրաքանչյուր դասավանդող կարող է ղեկավարել 3-5 աշխատանք։
Դասավանդողն իրավունք ունի հրաժարվել ղեկավարել ուսանողի մասնագիտական ուսումնասիրությունը՝ հիմնավորելով պատճառը։
Ուսանողն իրավունք ունի փոխել աշխատանքի ղեկավարին՝ հիմնավորելով պատճառը։
Մասնագիտական ուսունասիրությունների ներկայացումների օրացույցը կազմվում և հրապարակվոմ է յուրաքանչյուր ամսվա սկզբին։
Մասնագիտական ուսումնասիրություն կատարելու պահանջներն են՝
- Նոր բան սովորելու ցանկություն
- Թեմայի ընտրություն
- Արդիականություն
- Գրծնական կարևորությունը
- Հետազոտության կոնկրետ շրջանակների մատնանշում
- Նպատակների ձևակերպում
- Խնդիրների ձևակերպում
- Մեթոդաբանություն
- Աշխատանքի բովանդակություն
Մասնագիտական ուսումնասիրության կառուցվածքը, սկզբունքներն ու տեխնիկական պահանջներն են՝
- Տիտղոսաթերթ
- Ներածություն՝ թեմայի և արդիականության հիմնավորում, ուսումնասիրության իրականացման նպատակներ, խնդիրներ, մեթոդաբանություն, գործնական մաս։
- Հիմնական մաս՝ գլուխներ, ենթագլուխներ
- Եզրակացություն և առաջարկություններ
- Օգտագործված գրականության ցանկ
- Հանրային ներկայացում
Աշխատանքի տեխնիկական պահանջներ
- Մասնագիտական ուսումնասիրությունը հրապարակվում է բլոգում։
- Մասնագիտական ուսումնասիրությունը համակարգչային շարվածքով հրապարակային ներկայացվում է տպագիր, կազմված և էլեկտրոնային տարբերակներով: Թղթի չափսը՝ A4 (210 մմ x 297 մմ), լուսանցքները՝ ձախից 3.0 սմ, աջից, վերևից և ներքևից՝ 2.0 սմ: Նյութը տպվում է թերթի միայն մեկ երեսին: Տեքստը մուտքագրվում է «Յունիկոդ» (Unicode) կոդավորման համակարգի տառատեսակների կիրառմամբ՝ հայերեն տեքստերի դեպքում՝ GHEA Grapalat կամ GHEA Mariam, իսկ ռուսերեն և անգլերեն տեքստերի դեպքում՝ Times New Roman: Վերնագրերը և տեքստը շարվում են 12 pt տառաչափով, միջտողային հեռավորությունը՝ 1.5: Գլուխների վերնագրերը գրվում են թավ (bold), մեջտեղից և գլխատառերով: Յուրաքանչյուր գլուխ սկսվում է նոր էջից, իսկ ենթագլուխները կարող են շարունակվել նույն էջում: Պարբերությունները հավասարեցվում են երկու կողմերից, սկսվում են 1սմ խորքից: Աշխատանքի բոլոր էջերը, ներառյալ հավելվածները, համարակալվում են ներքևում՝ աջ կողմից: Համարակալումն սկսվում է առաջին էջից, որի վրա առաջին էջը չի դրվում:
2. Աշխատանքում առկա աղյուսակները, նկարներն ու գծապատկերները, հավելվածները և այլն համարակալվում են, և դրանց դրվում են անվանումներ (անհրաժեշտության դեպքում տրվում են նաև ծանոթագրություններ): Նկարների, գծապատկերների, գծագրերի անվանումները, նշանակումների բացատրությունները գրվում են դրանց ներքևում, մեջտեղում՝ 10 pt տառաչափով: Աղյուսակների անվանումները գրվում են դրանց վերևում աջ մասում, իսկ հավելվածներինը՝ նոր էջի վերին աջ անկյունում:
3. Աշխատանքի վերջում տրվում է օգտագործած գրականության ցանկը՝ ըստ օգտագործած գրականության հերթականության: Ցանկում գրականությունը ներկայացվում է բնագրի լեզվով: Նախ նշվում են հեղինակի (ների) ազգանունը (ները) և անվան սկզբնատառը (երը), այնուհետեւ նյութի՝ գրքի կամ հոդվածի ամբողջական անվանումը, ամսագրի լրիվ կամ ընդունված կրճատ անվանումը, հրատարակման վայրը, հրատարակչությունը, հրատարակման թվականը, հատորի և թողարկման համարները, հերթական համարը, էջերը կամ գրքի էջերի քանակը: Համացանցում տեղադրված նյութերի դեպքում կիրառվում են նույն սկզբունքները՝ վերջում նշելով համապատասխան նյութի հղման հասցեն և ծանոթանալու ամսաթիվը (օրինակ՝ http://www.aspu.am, 14.06.2017):
Աշխատանքի ծավալը չի սահմանափակվում։
Օտարալեզու աղբյուրների օգտագործումը խրախուսելի է։
Աշխատանքի ներկայացման համար տրվում է մինչև 20 րոպե։
Մասնագիտական ուսումնասիրության հանրային ներկայացման մասնակիցներն են՝
- Քոլեջի ղեկավարը
- Ուսումնասիրության թեմայի ղեկավարը
- Դասավանդողներ
- Աշխատանքով հետաքրքրվող այլ անձինք։
Գնահատում
Մասնագիտական ուսումնասիրության գնահատման ամփոփիչ միավորը ձևավորվում է գրախոսի, ուսումնասիրության ղեկավարի և նախապես ընտրված ուսանողական գնահատող խմբի անդամների նշանակած միավորների միջինացմամբ։
Ընդ որում՝
- ավարտական աշխատանքի արդիականության հիմնավորումը, գրականության վերլուծությունը՝ 1 միավոր,
- ուսումնասիրության իրականացումը և արդյունքները՝ 2 միավոր,
- գնահատվում են գրախոսի կողմից, իսկ աշխատանքի շարադրումը, ձևավորումը, հրապարակային պաշտպանությունը, ընդհանուր գիտելիքների տիրապետումը՝ 3 կամ 4, գնահատվում է հանձնաժողովի անդամների կողմից։
Աշխատանքը գնահատում են ամփոփիչ հանձնաժողովի միայն այն անդամները, ովքեր ներկա են եղել տվյալ ուսանողի ներկայացմանը ամբողջ ընթացքում։
Հանձնաժողովի գնահատման արդյունքները հրապարակվում են ամփոփումից անմիջապես հետո ուսանողի ներկայությամբ։
Մանկավարժության լաբորատորիա 